呢到應該有不少看倌都係投資老手，有錯請指正。
經白表eIPO抽完新股入番去證券戶口就試得多，倒轉拎出黎真係第一次，不過人一世物一世，乜都要試吓。
因為用銀行買賣股票，所以要去銀行填份表申請提番啲股票出黎，之後先可以去辦股份過戶。
職員話可以根據您要求分做幾多張股票，亦可以要求一張過，甚至，乜都唔要求。
由於轉名費係遂張收錢，所以，唔要求分做幾多張股票就要預至少一手一張，但職員強調唔會離譜到一股一張。
不過，轉名費最低消費都係$2.5一張，加急貴幾蚊，所以我唔揀，睇吓佢點分。(最後係一手一張)
當然，申請提倉要俾錢，以某中資銀行為例，每手$30，最低消費$100，但每間銀行收費唔同，證券行聽聞係最平。
我9月28去銀行搞，職員話一般3-5個工作天，但10月3號已經通知我可以去拎。
除咗幾張唔係我名嘅股票外(未轉名嘛)，仲有上面呢張由香港交易所(中央結算!?)發出嘅收據與及一張轉讓書，成疊釘埋一齊。
銀行職員千叮萬囑我唔好拆粒釘，一併拎去稅局同過戶處。(乜我似咁多手嗎?)
轉讓書上已經有股份數量等資料，自己填番個人資料，包括銀行戶口號碼(用嚟收息)，唔填戶口號碼都得，股息會以支票形式寄出，另外搵個見證人填個人資料同簽名。
然後就下個步驟-打釐印。
拎晒成疊嘢去稅局3樓6號窗交俾職員，然後等...等...等... !
等咗20分鐘，終於等到職員嗌名對資料同簽名，然後再等。因為買股票時已經俾咗印花稅，所以唔駛再排隊俾錢，齋等就得。
印象中，我舅父講過佢喺證券行提股票出黎，唔使去稅局打釐印，但我懷疑只係證券行代辦去打釐印，搵次去證券行開個戶口試吓。
等到拎番疊嘢時，轉讓書右上角已經打咗釐印，就咁可以去下一步-過戶處。
上網爬文時發現好多人都話去完稅局，過去合和嘅中央證券辦過戶就得；亦有人話係睇隻股票係邊間過戶處，去番指定嘅過戶處先辦到。
原來每隻股票啲公司資料內都有寫明用邊間「股份登記處」(即係俗稱的過戶處)，以下面隻0278為例，過戶處就唔係中央證券。
不過，真係有唔少股票嘅過戶處都係中央證券。
而我提出嚟隻蚊型股個間過戶處就係無雷公咁遠，結果，趕喺人地停止辦理過戶前6分鐘衝到入去。
職員強調，不論邊間過戶處都好，一踏正停止過戶時間電腦就出唔到收據，咁就要行多趟。
比喻中央證券嗰啲要大長龍嘅過戶處，更加要預多少少去排隊，否則，排到您都唔一定做到。
轉名費就係呢一刻先俾，以交去過戶嘅股票數量嚟收錢，$2.5一張，十個工作天後憑單取貨，而且，可以揀過戶後拎一張股票定又係分拆一手一張。
但假如您有10手而揀一張過的話，他日想賣出2手的話，就要辦多一輪手續將啲股票分拆番，咁先可以入番嗰2手去證券戶口做買賣。
由於我無考慮要分開賣，所以要一張就算。
基本上，過戶手續就咁搞掂，等多幾日就可以去拎番張股票。
促使我寫呢篇，源於爬文見啲人教人打完釐印就去中央證券辦過戶，但我睇隻股票嘅資料係另一間過戶處。
直接打去過戶處問，職員話呢隻股票係上佢地到辦過戶，唔係去中央證券，仲好人到講咗三次佢地個地址。
點知去銀行拎疊嘢時，職員竟然嗌我去完稅局過中央證券辦過戶，仲提醒我佢地收4點半。
呢個情況當然信番過戶處職員，因為過戶手續係喺佢地到做，無乜理由佢地都搞錯卦。
由於要俾提倉費、轉名費，除非諗住長揸又有息派，否則轉揸實物股票未必有著數。
喜歡這篇的話，請按5次Likebutton，謝謝。
